Sad, kad smo
svi poteke i dide i babe, lipo je kadikad pasti na ditinjstvo, pa se na tren
provati sititi ondašnje dice, s kojon smo išli u zabavište (tako smo onda zvali
vrtić). Bilo je i onda među namin i divjih i pitomih, i neukih i zaigranih, ka
i skroz raskalašenih i nedokazivih. Ma, znalo bi se i u ono teško vrime treviti
da nas naskroz zaokupu i bajke i prikaze, pa da višje ne znamo ni koji smo, ni
čiji smo, prefin ni to na koga smo se uvrgli. Kad smo bili dica, u svetoga
Frane nan je bilo zabavište, a sad kad smo dide i babe, tamo nan je kafić. Kad
smo bili dica, s terace smo gledali snimanje filma Vlak bez voznog reda, s puno
sirotinje u kadru, a sad moremo, ka gosti samostanskog kafića, gledati rijeke
Japanaca i Korejaca, kako uživaju gledajući prama teraci u svetoga Frane. Da ne
bi ispalo da šta infišajen, domećen uz ovu štoriju i sliku iz dvanajstog miseca
1957., kad smo se na teraci u svetog Frane, di je bilo naše zabavište, našli
nas osan: sedan patujaka i ona, Snigulica. S liva na desno, metnićemo i njijova
imena i bezimena, da ne bi ispalo da šta izmišljamo: Vojo Skračić, Branko
Kužina, ja – Ivo Jakovljević, Joško Pulić, ona (u koju su svi patujci bili
zajubjeni, a ona to njanci da bi vidila), Jadranka Petrina, Nikica Belamarić,
Fabijan Bataljaku i Ivica Lovrić, s fenjeron, koji još svitli.
